लक्ष्मीपूजनाचा सर्वत्र झगमगाट

NewsZenn Nov 14, 2020 832 0

बाजारात उत्साहाचे वातावरण
पिंपरी : कोरोनाच्या पार्श्वभूमीवर बाजारावर त्याचा परिणाम होणार कि काय अशी परिस्थिती असताना, बाजारात सकारात्मक वातावरण पाहायला मिळाले. लक्ष्मीपूजन म्हणजे ऐश्‍वर्याचे प्रतीक. लक्ष्मीच्या स्वागतासाठी जय्यत तयारी बाजारात होती. शनिवारी सकाळपासूनच ऍटोमोबाईल, सराफी बाजारपेठ व वाहन खरेदीसाठी बाजारपेठ हाऊसफुल झाल्या होत्या. पिंपरी कॅंम्पमध्ये केरसुणीसह, लाह्या, बत्तासेच्या खरेदीसाठी दिवसभर लगबग सुरु होती. विद्युत रोषणाईने सायंकाळच्या वेळेत थाटामाटात लक्ष्मीचे आगमन झाल्याने चैतन्यमयी वातावरण शहर परिसरात दिसून आले.

पिंपरी-चिंचवड औद्योगिक नगरीत दिवाळी सण मोठ्या थाटामाटात साजरा होतो. बाजारपेठेत सायंकाळपर्यंत फुले व साहित्य खरेदीची लगबग सुरुच होती. शनिवार व रविवार जोडून सुट्ट्या आल्यामुळे खरेदीचा उत्साह आणखी पहावयास मिळाला. कंपन्या, बॅंका व शासकीय कार्यालयांना सलग तीन दिवस सुट्ट्या मिळाल्याने सर्वांची सजावटीची लगबग, कपडे खरेदी आणि बच्चे कंपनीची डिमांड पुरविण्याचे काम सुरु होते. ऑनलाइन व वर्क फ्रॉम होममधून काहींनी सुस्कारा सोडून दिवाळीचा मनसोक्त आनंद लुटला.
यावर्षी किराणा दुकानदार, भाजी विक्रेते यांनीही आकाशकंदिल, पणत्या, रांगोळी, लक्ष्मीच्या मुर्ती व इतर सिझनेबसल वस्तू विक्रीसाठी ठेवल्याचे पहावयास मिळाले. व्यापारी वर्गात लक्ष्मीपूजनाचा मोठा मान असतो. व्यावसायिकांनीही सकाळीच भल्या पहाटे दुकाने स्व्चछ धुवून हारांच्या माळा लावून सजविले होते. कंपन्यांमध्येही पूजेची जय्यत तयारी करण्यात आली होती. विद्युत रोषणाई लक्षवेधक होती. रांगोळ्यांचा सडा , फटाक्‍यांची आतषबाजी, दिवाळीच्या आरासामुळे वातावरण मंगलमय झाले होते. सर्वांनी मनोमन कोरोनाच्या दुसऱ्या लाटेपासून संकट तारण्याची प्रार्थना केली.

लक्ष्मी पूजनाच्या मुहूर्तावर ऍडव्हान्स बुकींग करून वाहने पूजेसाठी घरी नेण्यात आली होती. त्यामुळे शोरुमच्या दालनात गर्दी पहावयास मिळाली. लक्ष्मीपूजनाचा मुहूर्त दुपारी दोन ते रात्री बारापर्यंत असल्याने दिवसभर पूजनाचा उत्साह घरोघरी पहावयास मिळाला. काही ठिकाणी फटाक्‍यांची आतषबाजी न करता आल्हाददायक वातावरणात पूजनाचा आनंद कुटुंबियांनी घेतला.