राजस्थानचा पहिल्याच सामन्यात रॉयल विजय

NewsZenn Mar 30, 2022 926 0

राजस्थान संघाने हैदराबाद संघाचा सूर्य तळपू न देता अस्त करत मिळवला ६१ धावांनी रॉयल विजय. आएपीएल २०२२ च्या आजच्या एकूण पाचव्या आणि पुण्याच्या गहूंजे स्टेडियमवर झालेला पहिला सामना जो राजस्थान रॉयल्स विरुद्ध सनराईज हैदराबाद या दोन संघाचाही पहिलाच सामना दिवसरात्र खेळवला गेला.

ज्यात राजस्थान संघाने हैदराबाद संघावर ६१ धावांची मात करत एक मोठा विजय मिळवून आपल्या पहिल्याच सामन्यात धडाकेबाज सुरुवात केली आहे. उत्कृष्ट नेतृत्वकौशल्य दाखवणाऱ्या आणि जोरदार धडाकेबाज फलंदाजी करत अर्धंशतक करणाऱ्या संजू सॅमसनला सामनावीर म्हणून गौरविण्यात आले.

आज सनराईज संघाचा कर्णधार केन विल्यमसनने नानेफेक जिंकली आणि प्रथम गोलंदाजी करण्याचा निर्णय घेतला जो राजस्थान रॉयल्सच्या फलंदाजांनी जबरदस्त फलंदाजी करत पूर्णतः चुकीचा ठरवला. त्यांच्या डावाची सुरुवातच एकदम झकास झाली. युवा यशस्वी जैस्वाल आणि जॉस बटलर या जोडीने राजस्थान संघाला रॉयल सुरुवात करून देताना ३७ चेंडूत ५८ धावांची जोरदार सलामी करून दिली.

जैस्वाल कडे भविष्यातला सलामीवीर म्हणून बघितले जात आहे, अतिशय सामान्य कुटुंबातील या प्रतिभावंत मुलाने युवा विश्व कप मधील पदार्पणा पासुनच भल्याभल्यांना प्रभावित केलेले आहे. आज मात्र तो मोठी धावसंख्या करण्यात यशस्वी झाला नसला तरी त्याने दोन चौकार आणि एक षटकार मारत वेगवान २० धावा करताना पहिल्या गड्यासाठी ५७ धावांची भागीदारी केल्यानंतर तो शेफर्डच्या गोलंदाजीवर झेलबाद झाला.

त्यानंतर आला तो कर्णधार संजू सॅमसन आंतरराष्ट्रीय स्तरावर जरी संजूने अजूनही फार मोठी दखलपात्र कामगिरी केली नसली तरी आयपीएलमध्ये मात्र त्याचे नाणे त्याने अगदी खणखणीतरित्या वाजवले आहे. आजही त्याने जबरदस्त फलंदाजी करताना केवळ २७ चेंडूत ३ चौकार आणि ५ उत्तुंग षटकात मारत ५५ धावा करताना सनराईज हैदराबाद संघाच्या गोलंदाजांना पळता भुई थोडी केली.

त्याने बटलर सोबत जरी १५ च धावांची भागीदारी केली असली तर नंतर त्याने देवदत्त पडीकल सोबत ७३ धावांची मोठी भागीदारी करून राजस्थान संघाला सुस्थितीत आणले. पडीकलही आक्रमक खेळत होता, त्याने केवळ २९ चेंडूत आक्रमक ४१ धावा काढल्यानंतर तो उमरान मलिकच्या गोलंदाजीवर त्रिफळाबाद झाला.पण याने जराही विचलित न होता संजूने आक्रमक अंदाजात आपले आयपीएल मधले वैयक्तिक १६ वे अर्धशतक पूर्ण केले.त्यात आणखी ५ धावांची भर घालून तो भुवनेश्वरच्या गोलंदाजीवर अब्दुल समदच्या हातात झेल देऊन बाद झाला,त्यानंतर हेटमायरने आक्रमक शैलीत केवळ १३ चेंडूत ३ षटकार आणि दोन चौकार मारत केलेल्या ३२ धावांमुळे राजस्थान रॉयल्सच्या संघाने 200 धावांचा टप्पा पार केला.

रियान परागने त्याला दिलेल्या चांगल्या साथीमुळे राजस्थान रॉयल्स संघाने आपल्या निर्धारित २० षटकात सहा गडी गमावून २१० धांवा केल्या. विजयासाठी हव्या असलेल्या २११ धांवा काढण्याच्या उद्देशाने सनराईजचा संघ मैदानात उतरला खरा,पण त्याचा सुर्य काही आज काही तळपला नाही. त्यांची सुरुवात अतिशय खराब झाली. कर्णधार आणि जगातला एक श्रेष्ठ फलंदाज म्हणून विख्यात असलेल्या केन विल्यमसन आज त्या किर्तीला जराही जागला नाही.

आणि तो डावाच्या दुसऱ्याच षटकात प्रसिद्ध कृष्णाची शिकार ठरला,यावेळी संघाची धावसंख्या एक बाद तीन अशी होती, यात आणखी चार धावांची भर पडलेली असतानाच भरवशाचा राहुल त्रिपाठीही कृष्णाच्याच गोलंदाजीवर संजू सॅमसनच्या हातात झेल देवून बाद झाला तर खतरनाक निकोलस पुरनला आपले खातेही उघडता आले नाही, त्याला बोल्टने पायचीत केले.

या धक्क्यातून कसेबसे सावरत धावसंख्या ९ व्या षटकात २९ वर पोहचली तोच अभिषेक शर्मा सुद्धा वैयक्तिक ९ धावा काढून चहलची पहिली शिकार ठरला.चार बाद २९ अशा कठिण आणि लाजिरवाण्या धावसंख्येत 8 च धावांची भर पडलेली असताना अब्दुल समदलाही चहलने वैयक्तिक चार धावांवर असताना परागच्या हातात झेल द्यायला लावून बाद केले आणि सनराई ज संघाची अवस्था दहा षटकातच ५ बाद ३७ अशी झाली.यानंतर सनराईज संघाचा पराभव निश्चितच दिसायला लागला होता.

फक्त तो किती धावांनी होणार इतकेच औत्सुक्याचे होते.मार्करम,सूंदर आणि शेफर्डच्या धडपडीने सनराईज संघाला कसाबसा १२५ धावांचा टप्पा गाठता आला,प त्याने पराभव टळला नाही तो नाहीच. आणि सनराईज संघाचा सूर्य आज जराही तळपला नाहीच,झाला तो अस्तच.ज्यामुळे राजस्थान संघाला एक रॉयल विजय मिळाला तो तब्बल ६१ धावांचा.सनराईज संघासाठी त्यातल्या त्यात समाधानाची बाब म्हणजे एडीयन मार्करमचे पहिले आयपीएल अर्धंशतक, जे आले ते केवळ 41 चेंडूत आणि अतिशय खडतर परिस्थितीत.

ज्यात ५ चौकार आणि दोन षटकार सामील होते.त्याला वोशिंग्टननेही सुंदर साथ देत केवळ १४ चेंडूत आक्रमक ४० धावा केल्या.मात्र एवढ्या सगळ्या धडपडीने हैदराबाद संघाला फक्त १४९ च धावा जमवता आल्या.राजस्थान संघाकडून यजुवेंद्र चहलने सर्वाधिक तीन बळी घेतले तर त्याला बोल्ट व प्रसिद्ध कृष्णाने दोन दोन गडी बाद करत चांगली साथ दिली.

संक्षिप्त धावफलक