सोसायट्यामध्ये होणार आमदार निधीतून कामे

NewsZenn Jun 24, 2022 2070 0

शहरी भागातील - खासगी सहकारी गृहनिर्माण सोसायट्यांमध्ये आता स्थानिक आमदार निधीच्या माध्यमातून विकासकामे करता येणार आहेत. त्यानुसार एका सोसायट्यांमध्ये जास्तीत जास्त ५० लाखापर्यंतची विकासकामे करता येतील. यामध्ये रस्ते, पेव्हिंग ब्लॉक, सीसीटिव्ही कॅमेरे अशा कामांचा समावेश आहे.

राष्ट्रवादी काँग्रेसचे वडगावशेरीचे आमदार सुनिल टिंगरे यांनी सोसायट्यांमध्ये विकासकामे करण्यास परवानगी मिळावी, यासाठी गेली वर्षभर सातत्याने पाठपुरावा केला होता. त्यानुसार उपमुख्यमंत्री अजित पवार यांनी पुढाकार घेतला. त्यानुसार राज्य शासनाने हा निर्णय घेतला आहे. यापुर्वी आमदार निधीतून सहकारी सोसायट्यांमध्ये विकासकामे करता येत नव्हती. त्यात अनेक सोसायट्यांमधील नागरी समस्या सोडविण्यास मर्यादा येत होती. या निर्णयाने सोसायटीधारकांनाही मोठा दिलासा मिळणार आहे.

दरम्यान, या कामांसाठी काही अटी शर्ती असणार आहेत. यानुसार एका आमदाराला एका वर्षात अडीच कोटींची विकासकामे करता येणार आहेत. संबंधित सहकारी गृहनिर्माण संस्थेची नोंदणी महाराष्ट्र सहकारी संस्थेतंर्गत झालेली असणे बंधनकारक आहे. तसेच या सोसायटीला महापालिकेची मंजुरी असणे म्हणजेच भोगवटापत्र असणे आवश्यक आहे.

" शहरी भागातील मोठ्या सोसायट्यांमध्ये काही हजार नागरिक असतात. त्यात विकासकामे करण्यास परवानगी नव्हती. प्रामुख्याने सोसायट्यांतील रहिवाशांना फ्लॅटचे हप्ते, मिळकतकर, मेंटेन्स याचा खर्चाचा भार सहन करावा लागत असल्याने सोसायट्यातील अंतर्गत विकासकामे करण्यास अडचण येत होती. आता मात्र हा प्रश्न सुटणार आहे. असं सुनील टिंगरे म्हणाले.

ही कामे करता येणार...
रस्त्यांचे डांबरीकरण, सिस्थेटिंक रस्ते विकसीत करणे, रस्त्यांवर पेव्हिंग बसविणे, जॉगिंग ट्रॅक विकसीत करणे, व्यायाम शाळा अथवा छोटे मैदान करणे, छोटे उद्यान आणि ट्री गार्डन करणे, सीसीटिव्ही कॅमेरे आणि अग्निशमन यंत्रणा बसविणे, इलेट्रिक व्हेईकल चार्जीग स्टेशन उभारणे, सोलर सिस्टीम यंत्रणा बसविणे, सांडपाणी प्रक्रिया प्रकल्प उभारणे, कचरा प्रक्रिया प्रकल्प उभारणे, रेन हार्विस्टिंग प्रकल्प उभारणे.

Click Here To See More