Eknath Shinde : ठाकरेसेनेतून शिंदेसेनेत नव्हे, कायम शिवसेनेतच! भाईंचा 'गोऱ्हे पॅटर्न' नेमका काय? ठाकरे नामोहरम

NewsZenn Jun 30, 2026 6 0

मुंबई : उपमुख्यमंत्री आणि शिवसेनेचे मुख्य नेते एकनाथ शिंदे यांनी शिवसेना उबाठाचे विधान परिषदेचे आमदार सचिन अहिर यांचा पक्षप्रवेश घडवून आणत उद्धव ठाकरेंना मोठा धक्का दिला आहे. गेल्या आठवड्यात लोकसभेतील ठाकरेसेनेचे ९ पैकी ६ खासदार फोडताना शिंदेंनी पक्षांतरबंदी कायद्याला पद्धतशीर बगल दिली. तर यावेळी विधान परिषदेचे सदस्य असलेल्या अहिर यांना पक्षात घेताना शिंदेंनी पक्षांतरबंदी कायद्यातील पळवाटेचा आधार घेतला.

२०१९ मध्ये सचिन अहिर यांनी शिवसेनेत प्रवेश केला. त्यावेळी शिवसेना अखंड होती. १९९९, २००४ आणि २००९ मध्ये सचिन अहिर यांनी राष्ट्रवादी काँग्रेसच्या तिकिटावर विधानसभा निवडणूक लढवली आणि विजयी झाले. काँग्रेस-राष्ट्रवादी काँग्रेसच्या सरकारमध्ये ते राज्यमंत्री होते. जून २०१९ मध्ये विधानसभा निवडणुकीच्या तोंडावर अहिर यांनी शिवसेनेत प्रवेश केला. २०२२ मध्ये त्यांना ठाकरेंनी विधान परिषदेवर संधी दिली. त्यावेळीही शिवसेना अखंड होती. ते अखंड शिवसेवेकडून विधान परिषदेवर गेले होते.

सचिन अहिर यांना आपल्या गोटात आणताना उपमुख्यमंत्री एकनाथ शिंदेंनी ' नीलम गोऱ्हे पॅटर्न' वापरला आहे. नीलम गोऱ्हे यांना उद्धव ठाकरे ंनी चारवेळा विधान परिषदेवर संधी दिली. २००२ ते २००८, २००८ ते २०१४, २०१४ ते २०२० या कालावधीत ठाकरेंनी नीलम गोऱ्हे यांना विधान परिषदेवर संधी दिली. २०१९ मध्ये त्या विधान परिषदेच्या उपसभापतीपदी बिनविरोध निवडून आल्या. २०२० मध्ये ठाकरेंनी त्यांना विधान परिषदेवर पुन्हा संधी दिली. त्यावेळी राज्यात महाविकास आघाडीचं सरकार होतं. उद्धव ठाकरे मुख्यमंत्री होते.

जून २०२२ मध्ये शिंदे यांनी शिवसेनेच्या इतिहासातील सर्वात मोठं बंड केलं. त्यांनी ४० आमदारांसह ठाकरेंची साथ सोडली. ठाकरे यांचं सरकार कोसळलं. पक्ष आणि चिन्हदेखील ठाकरेंच्या हातून गेलं. शिवसेनेची सुत्रं शिंदेंकडे जाताच वर्षभरानंतर नीलम गोऱ्हेंनी ठाकरेंची साथ सोडली. त्यामुळे त्यांचं उपसभापतीपदही कायम राहिलं.

आता सचिन अहिर यांना शिवसेनेत घेताना शिंदे यांनी नीलम गोऱ्हे पॅटर्न वापरला आहे. शिवसेना एकसंध असताना, शिवसेनेकडून विजयी झालेल्या, विधान परिषदेवर गेलेल्या सचिन अहिर यांना शिंदेंनी आपल्याकडे घेतलं आहे. त्यामुळेच अहिर यांच्या पक्षप्रवेशावेळी शिंदेंनी पक्षांतरावर भाष्य करताना ते शिवसेनेकडून निवडून गेले होते आणि आता ते शिवसेनेतच येत आहेत, असं म्हटलं. विशेष म्हणजे नीलम गोऱ्हे यांनी शिंदेसेनेत जाऊन त्यांचं उपसभापतीपद कायम राखलं. तर अहिर शिंदेसेनेत जाऊन उपसभापतीपद मिळवणार आहेत. या निवडणुकीसाठी त्यांनी अर्ज दाखल केला आहे. महायुतीचं संख्याबळ पाहता अहिर यांचा विजय निश्चित आहे.