अजित पवारांकडून पुण्यात भाजपला खिंडार, कार्यकर्त्यांसह नेत्याने बांधले घड्याळ

NewsZenn Sep 28, 2022 688 0

पुणे : आगामी महापालिका निवडणुकीवर भाजपने लक्ष केंद्रित केले आहे. पुणे महापलिकवर पुन्हा सत्ता मिळवण्यासाठी भाजपचे (BJP) बडे नेते पुण्यात लक्ष घालत असून, दौरेही करत आहेत. मात्र अशातच राष्ट्रवादी काँग्रेस (NCP) पक्षाचे ज्येष्ठ नेते तथा विधानसभा विरोधी पक्षनेते अजित पवार यांनी पुण्यातील नेत्याला गळाला लावून भाजपला खिंडार पाडले आहे.

अजित पवार यांच्या उपस्थितीत बालेवाडी येथील एकेकाळचे काँग्रेस पक्षाचे निष्ठावंत नेते राहुल बालवडकर यांनी मुंबई येथे राष्ट्रवादी काँग्रेसमध्ये प्रवेश केला आहे. त्यांच्या अनुभवाचा आणि दांडग्या जनसंपर्काचा राष्ट्रवादीला बालेवाडी भागात पक्षवाढीसाठी फायदा होईल, असे पवार यांनी या वेळी सांगितले.

बालवडकर यांनी २००७ ची महापालिका निवडणूक काँग्रेसकडून लढविली होती. त्या वेळी माजी नगरसेवक बाबूराव चांदेरेंकडून त्यांचा पराभव झाला होता. त्यानंतर काही वर्षे राजकारणापासून अलिप्त राहून पुन्हा २०१७ मध्ये चुलत बंधू, भाजपचे माजी नगरसेवक अमोल बालवडकर यांना निवडणुकीसाठी मार्गदर्शन केले होते. दरम्यान, पालिका निवडणुका तोंडावर असतानाच बाबूराव चांदेरे यांच्या पुढाकारातून बालवडकर यांनी राष्ट्रवादीत प्रवेश केला.

यावेळी आनंदा कांबळे, विशाल बालवडकर, तुषार बालवडकर, शशिकांत बालवडकर, प्रशांत बालवडकर, सागर बालवडकर, राजेश बालवडकर, अथर्व बालवडकर आदी कार्यकर्त्यांनी राष्ट्रवादी काँग्रेस पक्षात प्रवेश केला.याप्रसंगी महिला प्रदेशाध्यक्ष विद्याताई चव्हाण, खासदार सुनिल तटकरे, आमदार अतुल बेनके, कोथरुड मतदार संघाचे कार्याध्यक्ष नितीन कळमकर, मनोज बालवडकर, समिर चांदेरे, गणपत मुरकुटे, देवीदास मुरकुटे, संजय ताम्हाणे, अरुण खंडेलवाल, चेतन बालवडकर आदी मान्यवर उपस्थित होते.

Click Here To See More