Heavy Rains Hit Tamhini Ghat : मुसळधार पावसाचा ताम्हिणी घाटाला फटका; दरड कोसळण्याच्या धोक्यामुळे घाटमार्ग सर्व वाहतुकीसाठी बंद

NewsZenn Jul 6, 2026 39 0

पुणे, दि. ६ जुलै : राज्यात सुरू असलेल्या मुसळधार पावसाचा फटका आता ताम्हिणी घाटालाही बसला आहे. घाट परिसरात निर्माण झालेल्या धोकादायक परिस्थितीमुळे पौड-माणगाव (ताम्हिणी घाट) मार्ग पुढील आदेशापर्यंत सर्व प्रकारच्या वाहतुकीसाठी बंद करण्यात आला आहे.

मुसळधार पावसामुळे आदरवाडी परिसरात रस्त्यावरून मोठ्या प्रमाणात पाण्याचा प्रवाह सुरू असून, दरड कोसळण्याचा गंभीर धोका निर्माण झाला आहे. नागरिकांच्या आणि वाहनचालकांच्या सुरक्षेला प्राधान्य देत प्रशासनाने हा निर्णय घेतला आहे. या संदर्भात उपविभागीय अधिकारी (मावळ-मुळशी), पौड पोलीस ठाण्याचे वरिष्ठ पोलीस निरीक्षक यांच्याशी चर्चा करून वाहतूक बंद करण्याचा निर्णय घेण्यात आला. तसेच रायगड जिल्ह्यातील माणगावचे प्रांताधिकारी, तहसीलदार आणि पोलीस निरीक्षक यांनाही त्यांच्या कार्यक्षेत्रात आवश्यक ती खबरदारी आणि कार्यवाही करण्याच्या सूचना देण्यात आल्या आहेत.

प्रशासनाने नागरिक, पर्यटक आणि वाहनचालकांना पुढील सूचना मिळेपर्यंत ताम्हिणी घाट मार्गाचा वापर करू नये, असे आवाहन केले आहे. तसेच पर्यायी मार्गांचा वापर करून अनावश्यक प्रवास टाळावा आणि प्रशासनाला सहकार्य करावे, असेही प्रशासनाने स्पष्ट केले आहे.

सध्या घाट परिसरात पावसाचा जोर कायम असल्याने नागरिकांनी हवामान आणि प्रशासनाच्या सूचनांचे पालन करून सुरक्षिततेला प्राधान्य द्यावे, असे आवाहन करण्यात आले आहे.