Pune : रक्षकच बनले भक्षक! भरतीत गुण वाढवून देण्याचे आमिष दाखवत महिलेवर अत्याचार; PSIसह कॉन्स्टेबल अडचणीत

NewsZenn Jul 10, 2026 8 0

पुण्यातील एका पीएसआयसह पोलीस कॉन्स्टेबलवर एका महिलेनं अत्याचाराचे गंभीर आरोप केले आहेत. भरतीत चांगले गुण मिळवून देण्याचं आमिष दाखवत अत्याचार केल्याचं पीडितेनं तक्रारीत म्हटलं आहे.

पोलीस भरतीत जास्त गुण मिळवून देण्याचं आमिष दाखवत एका महिलेवर पोलिसांनीच अत्याचार केल्याचा धक्कादायक प्रकार पुण्यात उघडकीस आला आहे. या प्रकरणी बारामती ग्रामीण पोलीस ठाण्यात गुन्हा दाखल झाला आहे. पोलीस उपनिरीक्षक अमरनाथ कुंभार आणि बँड पोलीस कॉन्स्टेबल मारुती करे अशी आरोप करण्यात आलेल्या पोलिसांची नावे आहेत. या प्रकरणी बारामती ग्रामीण पोलीस अधिक तपास करत आहेत.

याबाबत मिळालेली माहिती अशी की, पोलीस उपनिरीक्षक अमरनाथ कुंभार हे राज्य राखीव पोलीस दलात कार्यरत असून मारुती करे मुंबई पोलीस दलात बँड कॉन्स्टेबल आहे. दोघांवर एका महिलेनं पोलीस भरतीत चांगले गुण मिळवून देण्याचं आमिष दाखवत अत्याचाराचा आरोप केला आहे. या आरोपांनी पोलीस दलात खळबळ उडाली आहे.

पीडितेनं दिलेल्या तक्रारीनंतर लैंगिक शोषण प्रकरणी गुन्हा दाखल केला आहे. दरम्यान, याआधी गुन्हा दाखल करण्यासाठी तिने पोलिसात धाव घेतली होती. पण पोलिसांनी दाद न दिल्यानं तिनं न्यायालयात याचिका दाखल केली. याचिका दाखल केल्यानंतर न्यायालयाने दोन्ही आरोपींवर अॅट्रॉसिटी आणि अत्याचार प्रकरणी गुन्हा दाखल करण्याचे आदेश दिले.

दरम्यान, दोन्ही पोलिसांवर गुन्हा दाखल झाला असला तरी त्यांना अटक झाली नसल्यानं पीडितेनं संताप व्यक्त केला आहे. गुन्ह्याचं स्वरुप गंभीर असं आहे. मात्र तरीही पोलीस प्रशासनाकडून त्यांना अटक केली जात नसल्याचा आरोप पीडितेनं केलाय. या प्रकरणी आरोपींना तात्काळ ताब्यात घेतलं नाही तर पुणे ग्रामीण पोलीस अधीक्षक कार्यालयासमोर धरणे आंदोलनाचा इशाराही पीडितेनं दिला आहे.